Роден е 1976 година во Охрид. Дипломирал и магистрирал на Електротехничкиот факултет во Скопје во 2000 и 2004, соодветно. Докторирал на Факултетот за електротехника и информациски технологии во 2008 година. Првото работно искуство го имал во Неоком А.Д. во 2000 година, каде работел на позициите софтверски архитект, проект менаџер и програмер. На Институтот за компјутерска техника и информатика при Електротехничкиот факултет во Скопје работи од 2000 година како демонстратор. Звањата помлад асистент и асистент ги стекнал во 2003 и 2005 година, соодветно. Во 2008 година бил избран во звањето доцент. Како асистент бил вклучен во одржувањето настава по предмети од областа на програмски јазици, структури и бази на податоци, структурирано програмирање, објектно ориентирано програмирање, објектно ориентирани системи, бази на податоци, објектно ориентирана анализа и дизајн и информациони системи. Како доцент, вонреден професор, па редовен професор на ФИНКИ одржува настава по предмети од областите бази на податоци, објектно ориентирана анализа и дизајн, алгоритми и податочни структури, информациски системи, наука за податоците. Моментално е координатор на магистерската студиска програма по биоинформатика, и на докторската студиска програма компјутерски науки и инженерство. Претходно раководел и со магистерските студиски програми содржинско базирано пребарување и интелигентни информациони системи, каде одржувал настава на дел од предметите покриени со овие студиски програми. Автор е на седумдесетина научни трудови објавени на меѓународни и домашни конференции и списанија, од кои седум се во списанија со фактор на влијание. Раководел со еден билатерален македонско-австриски проект, и со шест локални научно-истражувачки проекти, а додека пак во 15-тина научно-истражувачки проекти бил како учесник. Полињата на научно-истражувачки интерес вклучуваат наука за податоците, биоинформатика, вештачка интелигенција, податочни складишта, бази на податоци, анализа и дизајн на информациони системи.