Роден е 1961 година во Гевгелија. Основното и средното образование во Математичката гимназија “Георги Димитров” го завршил како првенец во генерацијата, со многу освоени први места и награди на градските, републичките и сојузните натпревари по математика и физика. На Електротехничкиот факултет во Скопје, насока компјутерска техника и информатика, дипломирал во 1985 година како првенец во генерацијата. Магистерскиот труд со наслов “Алгоритми за паралелни процесорски полиња”, изработен под менторство на проф. д-р. А. Грнаров, го одбранил на Електротехничкиот факултет во 1989 година Докторската дисертација со наслов “Processor array implementations of systems of affine recurrence equations in digital signal processing”, изработена под менторство на проф. д-р. Ј. Тасич и проф. д-р. Д. Ј. Еванс, ја одбранил на Универзитетот во Љубљана, Словенија, во 1992 година Во периодот 1991-1992 година престојувал на специјализација во Loughborough University of Technology, Велика Британија. По завршувањето на студиите се вработил во Рударскиот институт при Универзитетот “Св. Кирил и Методиј” во Скопје. Во 1988 година бил избран за помлад асистент на ИИ при ПМФ, во 1990 година за асистент, во 1993 година за доцент, во 1998 година за вонреден професор, а од 2003 година е редовен професор. Во периодот 1993/1995 година и во академската 1998-1999 година бил раководител на Компјутерскиот центар при ИИ, а во два мандата шеф на ИИ. Како асистент и наставник изведувал настава по бројни предмети за студентите по информатика и на другите студиски групи на ПМФ. На постдипломските студии на ИИ бил и е ментор на неколку магистранди и докторанди. Автор е или коавтор на 12 книги, на 124 публикации во списанија и на 17 софтверски апликации. На покана, држел предавања на универзитетите во: Белград, Љубљана, Ниш, Loughborough, Washington D.C. и Хаген-Германија. Д-р Гушев има развиено богата научноистражувачка дејност во областите: е-бизнис и интернет-технологии, мобилни и безжични апликации, алгоритми и паралелизам, процесорски полиња, архитектура на компјутери и компјутерски мрежи. Тој е автор или коавтор на 42 труда, повеќето објавени во меѓународни научни списанија. Потоа, 68 статии, со наслови зад кои стои неговото име, се печатени во зборници на трудови од меѓународни научни конференции одржани во Македонија, Србија, Хрватска, Словенија, Грција, Данска, Велика Британија, Германија, Италија и САД. На 48 конференции имал презентации. Во периодот 1990-2005 д-р Гушев бил раководител на 12 научни проекти. Во тек е реализација на уште 7 проекти под негово раководство. Член е на повеќе професионални организации и тела, консултант за информатичка технологија на министерства и на владини комисии, член во тимот за изработка на национална IT стратегија, на академски и на други институции, претседател на Советот на IT експерти при МАСИТ. Има резлизирано 11 апликации за разни корисници. Бил организатор на 4 семинари, на 5 работилници и на 4 конференции од меѓународен карактер. Тој е иницијатор, организатор и раководител на лабораториите за: безжични апликации, нови иновативни технологии, паралелно процесирање. Директор е на регионалната CISCO академија, Microsoft-академијата и на Тест-центарот за Pearson-Vue сертификати.