Александра Дединец е родена во Белград, Р. Србија на 22.01.1987. Основно и средно образование завршила во Охрид со континуиран одличен успех. Во 2005 година се запишува на редовни студии на Факултетот за електротехника и информациски технологии во Скопје, на насоката Информатика и компјутерско инженерство. Дипломирала на истиот факултет на 18.06.2009 со просечна оценка 10, со наслов на дипломскиот труд: “Оптимизација на сложени мрежни системи” под менторство на акад. Љупчо Коцарев.

Од oктомври 2009 година е ангажирана од Факултетот за  електротехника и информациски технологии во Скопје како демонстратор по предметите од подрачјето на Информатиката и компјутерското инженерство.

На магистерски студии од областа на Компјутерски мрежи и е-технологии се запишала во ноември 2009 година на Факултетот за електротехника и информациски технологии во Скопје. Испитите ги положила со просечна оценка 10. На 13.06.2011 магистрирала на истиот факултет на тема: “Моделирање и анализа на сложени мрежни системи”, под менторство на акад. Љупчо Коцарев.

Со отворањето на Факултетот за информатички науки и компјутерско инженерство, од октомври 2011 ангажирана е од страна на факултетот како демонстратор по предметите од подрачјето на Информатиката и компјутерското инженерство, а во 2012 година е вработена на факултетот како помлад асистент.

На докторски студии од областа Компјутерски науки и инженерство се запишала во Февруари 2012 година на Факултетот за информатички науки и компјутерско инженерство во Скопје. На 9.11.2017 докторирала на истиот факултет на тема: “Моделирање на паметни енергетски мрежи”, под менторство на акад. Љупчо Коцарев. За доцент на Факултетот за информатички науки и компјутерско инженерство е избрана во февруари 2018 година.

Во рамките на досегашната научно-истражувачка работа, автор/коавтор на 5 научни трудови со фактор на влијание и на над 15 публикации објавени во меѓународни зборници и научни списанија.